Difference between revisions of "938AS"
From Roman2Norman
Jump to navigationJump to searchLine 1: | Line 1: | ||
See this in [[938|Modern English]]. | See this in [[938|Modern English]]. | ||
<p><poem> | <p><poem> | ||
− | ::Her æþelstan cyning, | + | ::Her æþelstan cyning, | eorla dryhten, |
::beorna beahgifa, 7 his broþor eac, | ::beorna beahgifa, 7 his broþor eac, | ||
::Eadmund æþeling, ealdorlangne tir | ::Eadmund æþeling, ealdorlangne tir |
Revision as of 19:29, 8 February 2007
See this in Modern English.
<poem>
- Her æþelstan cyning, | eorla dryhten,
- beorna beahgifa, 7 his broþor eac,
- Eadmund æþeling, ealdorlangne tir
- geslogon æt sæcce sweorda ecgum
- ymbe Brunanburh. Bordweal clufan,
- heowan heaþolinde hamora lafan,
- afaran Eadweardes, swa him geæþele wæs
- from cneomægum, þæt hi æt campe oft
- wiþ laþra gehwæne land ealgodon,
- hord 7 hamas. Hettend crungun,
- Sceotta leoda 7 scipflotan
- fæge feollan, feld dænnede
- secgas hwate, siðþan sunne up
- on morgentid, mære tungol,
- glad ofer grundas, godes condel beorht,
- eces drihtnes, oð sio æþele gesceaft
- sah to setle. þær læg secg mænig
- garum ageted, guma norþerna
- ofer scild scoten, swilce Scittisc eac,
- werig, wiges sæd. Wesseaxe forð
- ondlongne dæg eorodcistum
- on last legdun laþum þeodum,
- heowan herefleman hindan þearle
- mecum mylenscearpan. Myrce ne wyrndon
- heeardes hondplegan hæleþa nanum
- þæ þe mid Anlafe ofer æra gebland
- on lides bosme land gesohtun,
- fæge to gefeohte. Fife lægun
- on þam campstede cyninges giunge,
- sweordum aswefede, swilce seofene eac
- eorlas Anlafes, unrim heriges,
- flotan 7 Sceotta. þær geflemed wearð
- Norðmanna bregu, nede gebeded,
- to lides stefne litle weorode;
- cread cnear on flot, cyning ut gewat
- on fealene flod, feorh generede.
- Swilce þær eac se froda mid fleame com
- on his cyþþe norð, Costontinus,
- har hilderinc, hreman ne þorfte
- mæca gemanan; he wæs his mæga sceard,
- freonda gefylled on folcstede,
- beslagen æt sæcce, 7 his sunu forlet
- on wælstowe wundun fergrunden,
- giungne æt guðe. Gelpan ne þorfte
- beorn blandenfeax bilgeslehtes,
- eald inwidda, ne Anlaf þy ma;
- mid heora herelafum hlehhan ne þorftun
- þæt heo beaduweorca beteran wurdun
- on campstede culbolgehnastes,
- garmittinge, gumena gemotes,
- wæpengewrixles, þæs hi on wælfelda
- wiþ Eadweardes afaran plegodan.
- Gewitan him þa Norþmen nægledcnearrum,
- dreorig daraða laf, on Dinges mere
- ofer deop wæter Difelin secan,
- 7 eft Iraland, æwiscmode.
- Swilce þa gebroþer begen ætsamne,
- cyning 7 æþeling, cyþþe sohton,
- Wesseaxena land, wiges hremige.
- Letan him behindan hræw bryttian
- saluwigpadan, þone sweartan hræfn,
- hyrnednebban, 7 þane hasewanpadan,
- earn æftan hwit, æses brucan,
- grædigne guðhafoc 7 þæt græge deor,
- wulf on wealde. Ne wearð wæl mare
- on þis eiglande æfer gieta
- folces gefylled beforan þissum
- sweordes ecgum, þæs þe us secgað bec,
- ealde uðwitan, siþþan eastan hider
- Engle 7 Seaxe up becoman,
- ofer brad brimu Brytene sohtan,
- wlance wigsmiþas, Weealas ofercoman,
- eorlas arhwate eard begeatan.
</poem> (Jebson)